साउन ७, परासी। नेपाल विद्युत् प्राधिकरणले नवलपरासी (सुस्ता पूर्व) त्रिवेणी गाउँपालिका–२ घुसेनीमा ११ केभी विद्युत् प्रसारण लाइनको तार छोएर गम्भीर घाइते भई दुवै हात गुमाएका बालकलाई उपचार खर्चसहित कुल १५ लाख ७१ हजार २५० रुपैयाँ क्षतिपूर्ति उपलब्ध गराउने भएको छ।

प्राधिकरण सञ्चालक समितिको बैठकले उपचार खर्च, क्षतिपूर्ति र कुरुवा खर्चसहितको उक्त रकम स्वीकृत गरेको हो।

​घुसेनिस्थित आमा समूहको भवनको छतमा खेलिरहेका बालकले नजिकै रहेको ११ केभी प्रसारण लाइनको तार छुँदा सो दुर्घटना घटेको थियो।

स्वीकृत रकम सम्बन्धित वितरण केन्द्रमार्फत पीडित बालकको परिवारलाई उपलब्ध गराइने नेपाल विद्युत् प्राधिकरणले जनाएको छ।

​प्राधिकरणले दुर्घटना क्षतिपूर्ति विनियमावली, २०६७ को विनियम ११ को उपनियम १ बमोजिम क्षतिपूर्ति र औषधि उपचारको खर्च भुक्तानी गर्दै आएको छ।

प्राधिकरणको विनियमावली अनुसार २ लाख रुपैयाँसम्मको क्षतिपूर्ति र औषधोपचार विभागीय प्रमुख, २ लाखदेखि ५ लाख रुपैयाँसम्म सम्बन्धित उपकार्यकारी निर्देशक, ५ लाख देखि १० लाख रुपैयाँको मुख्य प्रशासकीय अधिकृत र १० लाखभन्दा बढीको रकम सञ्चालक समितिले निर्णय गर्नुपर्ने कानुनी व्यवस्था रहेको छ।

​ऊर्जा, जलस्रोत तथा सिँचाइ मन्त्री विराजभक्त श्रेष्ठले कानुनी व्यवस्था र विगतका नजीरहरूका आधारमा पीडित बालकको परिवारलाई यो सहयोग गरिएको उल्लेख गरेका छन्।

मानिसको जीवनभन्दा ठूलो रकम नहुने बताउँदै मन्त्री श्रेष्ठले यो रकमले पीडा पूर्ण रूपमा नमेटाए पनि जीवनयापनमा थोरै भए पनि सहयोग पुग्ने अपेक्षा गरिएको बताए।

बीमा, उपचार र क्षतिपूर्तिको व्यवस्था एकातिर भए पनि पछिल्ला दिनमा बढ्दै गएको विद्युतीय दुर्घटनाको न्यूनीकरणका लागि प्राधिकरण र नागरिक समाज दुवै सचेत हुनुपर्ने उनको भनाइ छ।

​मन्त्री श्रेष्ठले हरेक वर्ष विद्युतीय दुर्घटनाबाट भइरहेको जनधनको क्षतिको तथ्यांक डरलाग्दो रहेको उल्लेख गर्दै प्राधिकरणलाई आफ्ना संरचनाहरूको मर्मत गर्ने, जोखिमयुक्त क्षेत्रमा निगरानी बढाउने, सुरक्षा सतर्कता अपनाउने र नागरिकलाई जनचेतना तथा पूर्वसूचनाका कार्यलाई तीव्रता दिन निर्देशनसमेत दिएका छन्।

विद्युतीय दुर्घटना न्यूनीकरण गर्न नागरिकको व्यक्तिगत सचेतना पनि उत्तिकै अपरिहार्य रहेको उनको भनाई छ।